原帖由碧落赋于2005-05-30, 19:42:38发表
公子，侬又回到吾格头了。
老天格安排，吾是要感激，还是要恨？我到处寻侬，寻着了一个疯疯癫癫格侬；我总算好一直陪侬，但是侬……侬竟变成了格恁样子。老早子伊格风度翩翩格侬，到阿俚头去了哉？
算了。反正格恁，侬就再亦勿用为了遥勿可及格皇帝梦伤精神，勿用拉江湖上头勾心斗角，打打杀杀。吾得子公子一道回燕子坞，回转到侬长大格地方，回转到吾第一趟碰着侬格地方。
公子，侬还记得伐？小辰光，吾第一趟到慕容屋里，侬看到吾，拿一块桂花糕放拉吾格手里向。伊天子起，我就拿侬亦放到我格心里向。我晓得，我只不过是一个小丫头，侬是大燕格后人，姑苏慕容格独生儿子，侬心里向哪能会得有我？我一直想，只要侬让我一生一世服侍侬，就够了。真格，够了。
但是我无母想到，最后头只有吾一介头陪了侬旁边头。
阿朱姊姊得子王姑娘一道走了。伊拉原来是大理段王爷格千金，是金枝玉叶，吾还是一个下贱格丫头。不过勿要紧，因为……因为吾有得公子。公子，侬放宽心。伊拉走了，侬还有阿碧。阿碧会陪了你，一道拉燕子坞开开心心格，我天天把侬唱小曲，把侬剥红菱，好伐？
公子，日头落下去了，阿拉一道回转去。