| | |
|
 组别 | 羽林都尉 |
| 级别 | 卫将军 |
| 功绩 | 73 |
| 帖子 | 6315 |
| 编号 | 168941 |
| 注册 | 2007-6-1 |
| 来自 | 昆崙 |
| |
| | |
|
|
|
|
轉來的
懷舊三國遊戲
遊戲名稱:卧龍傳之三國制霸之計
發行公司:松崗
發行日期: (暫時未能考究, 但因為係dos 遊戲, 相信出產年份早於98年, 十年以上冇走雞)
一個好舊0既遊戲, 資深少少0既三國遊戲迷如果玩過都對佢愛不釋手, 原因係呢個遊戲0既賣點同其他三國遊戲有0的唔同, 其實三國遊戲話就話係著重戰略, 但係實際上偏向戰術層面為多, 甚至有0的基本就係一個rpg game, 呢種三國遊戲0既可玩性唔會太高
而卧龍傳就實牙實齒係一個戰略遊戲, 遊戲冇任何花巧元素, 用自己勢力有限0既資源去完成制霸全國0既任務, 玩落就好似玩一盤圍棋一樣,雖然簡單, 但係可玩性極強, 因為你唔會見捉棋0既人捉到悶話唔再捉, 局勢鑊鑊新鮮鑊鑊金, 同一版你可以玩好多次, 而且講求食腦, 所以吸納唔少愛好三國歷史的玩家, 被喻為係第一代真正三國戰略遊戲。
簡單介紹一下個遊戲點玩, 遊戲中你唔係扮演君主, 亦唔係扮演武將, 而係扮演指生哂0既軍師一職, 你要向你自己勢力0既君主提出建議, 一0的簡單0既指令好似征兵, 軍隊指派, 你都可以自己渣主意, 唔駛問你老細, 但係去到一0的大方針,好似要遷都, 同其他勢力開戰或結盟, 你就要同你老細講聲先, 如果你錯看形勢, 提錯建議, 你老細會媽叉你, 遊戲有一條信任度槽, 代表你老細有幾信任你, 你做錯0既0野越多, 條槽扣得越勁, 扣到零就gameover(當然你個勢力比人打巢0左都係gameover).
呢個遊戲基本冇咩內政要搞, 係定下個稅率(決定你0既月收入同會影響你0的城池0既發展度, 稅率定得高你收入多, 但城發展會慢同可能發生人民暴動), 仲有就係定立征兵數量, 咁佢就會每個月慢慢增加兵源(當然唔係你會征幾多就幾多, 要睇你有幾多城池, 小勢力會為0左兵源不足而煩惱, 大勢力亦唔好顛0左咁征兵, 因為咁樣會駛好多錢), 可以設個內政官或外交官搞下城0既內政或者外交, 不過內政官呢個冇咩用, 一來你有太多城, 唔搞得咁多, 二來你用一個武將做內政官, 等於你少0左一個可以帶兵0既武將, 有時人手好缺, 唔值得咁做, 而且城池發展度只要你個稅率set得0岩就會自己慢慢升, 外交相對比較有用, 因為有時可能要同其他君主停戰(小勢力比人夾住打就死硬),
遊戲最著重就係戰鬥, 係戰略層面上0既戰鬥, 即係你點樣用手上0既武將同有限0既士兵, 放佢地0係咩位置去防守, 進攻人地0既邊個位置(就好似捉圍棋一樣), 張全國地圖係咁多三國遊戲之中我最鍾意0既一張,好大, 足足有超過150個城池, 兵力點樣部署係一大問題, 點樣將人地0既主力包圍攕滅, 以少勝多係遊戲0既重點,反而0係戰術層面就超級簡化, 軍隊相遇打仗時係一個小型0既即時戰略遊戲, 兩方軍隊單對單, 可以改變軍隊0既陣型, 然後埋牙互毆, 邊一方兵力或士氣跌過警戒線就要撤退, (呢方面好難三言兩語解清楚, 有機會再作詳解)
遊戲難度除0左要有周詳0既戰略部署之外, 兵源補給都係一大難題, 遊戲有一個設定, 就係你0既武將如果士兵冇得七七八八, 要補兵0既時候, 一定要番自己首都先可以補兵, 如果你個首都同前線離得太遠你就大鑊, 分分鐘你番首都補給完你前面0的城市已經比人搶哂, 而且行軍路線太遠仲有一個問題, 就係打仗要駛錢, 唔同0既情況會駛唔同數量0既錢, 你唔出兵, 只係得預備兵的話(即係征0左兵放0係度唔用), 咁就按預備兵多少而每月出糧, 你可以睇到自己0既月支出, 但係如果你要出兵就大鑊, 一組成軍隊就即時好似的士跳標咁逐日計錢, 停留0係城池0既軍隊扣少0的, 行走0既軍隊扣多0的, 你會見到你個國庫0的錢自己0係度減少緊, 所以如果你條行軍路線太長, 你0既軍隊要行好遠, 分分鐘行到前線已經冇哂錢, 冇哂錢唔會即刻gameover, 你仲可以繼續玩, 不過你個國庫會出現赤字(負數), 你君主對你0既信任度會逐個月減, 最後都係gameover, 呢個同真正0既戰爭好相似, 亦係要你攬盡腦汁0既地方。
下面有少少截圖, 因為個game太舊, 截圖唔多, 大家見諒, 不過聽講個game網上仲有得dl, 不過要用dos先玩到, 有興趣大家一齊懷舊下。
遊戲標題畫面
遊戲畫面(大家準備放大鏡吧.....)
|
|
|
|
